Jedem Gnoom sy Stroom
Usschnitt aus ihren Zedel 2015:
Mit dääre Frau im Bundeshuus
stygt d'Schwyz us der Atomkraft uus.
Sii bringt em Parlamänt dr Schmuus,
das setzt uff griene Öko-Pfuus
und kauft, wenn's knapp wird, denn verstoole.
vo Dytschland „suubere" Stroom us Koole.
Das git e bitzli CO-zwai,
em Doris isch das ainerlai.
Und isch ere blötzlig s ganz nümm ghüür,
denn draimt si still vom Lagerfüür,
und dyttet, linietreu katholisch,
dr Qualm als Weihrauch - rain symbolisch.
Mit schlittle in e neyi Zyt,
und sälli Zyt isch nimme wyt,
wo alles Beesi wird verschwinde,
wo d'Wält dr Drägg wird iiberwinde:
Null Nuklear und Null Chemie,
Null Bangge, Null Demokratie.
Drum: S Volgg befrooge? Soone Saich!
s gmain Volgg isch dumm und biirewaich.
Wär druss kunnt, huucht: „O SOLE MIO"
und's Doris joodlet: „SOLE IO".
D'IWB hänn uns ergläärt,
dass sii uf em Eleggtro-Määrt
numme no Bliemli-Strom beziehn,
und dass mir dää halt zahle mien.
Beliebig ka me Strom verdyyre,
der Räschte zahlt me mit de Styyre.
Egal was dur e Stegger schpruudlet,
Atom und Öko zämmepfuudlet:
Mir wänn nur e guet Gwisse poschte,
Das leen mir is au eppis koschte.
So lootse d'Öko-Rappeschpalter
uns zrugg diräggt ins Mittelalter.
Scho doozmool het me näbscht em Byychte
vo schwäre Sinde (und au lyychte)
Vyyl Gäld verlangt al Ytrittsbryys
fir no-n-em Dood ins Paradyys.
Statt fir dä Aberglaube z'schpände
wänn mir an d'Schwyz die Botschaft sände:
Diend d'Energie derzue verwände,
dä Energie-Wänd-Furz z'beände!